الراجل خيال الظل
والمرجانة عروسة البحر

كان يا ما كان.. كان في الراجل خيال الظل. الراجل خيال الظل ده كان بيتكوّن مع شروق الشمس راجل، وأول ما ييجي الغروب يختفي ويبقى بس خيال ظل. كان دايمًا يظهر ويكون موجود أول ما الشمس تشرق.

كان الراجل خيال الظل بيحب المرجانة عروسة البحر. كان كل يوم يشوفها وهي بتعوم، بس هي مكانتش بتشوفه، عشان لما هو كان بيظهر مع شروق الشمس هي بتكون نايمة في البحر.

كان الراجل خيال الظل كل يوم يبعت للمرجانة عروسة البحر وردة مع الحمامة الخضرا.. وردة تبقى ماسكاها الحمامة ببقها.

ولما تروح الحمامة عشان تدي الوردة للمرجانة عروسة البحر، كانت المرجانة تفضل تدور مين اللي بعت الوردة مع الحمامة الخضرا.. متلاقيش غير ظل الراجل خيال الظل. وكان كل يوم توصلها الوردة، والراجل خيال الظل يشوف المرجانة عروسة البحر ويحلم بيها.

وكان في الأخطبوط الشرير. الأخطبوط ده كان عايز يخطف المرجانة عروسة البحر. كان دايمًا بيحوم حواليها وعايز يلدغها، عشان كان في أطرافه دراعات بتطلّع حاجة بتنيّم.

فقرص المرجانة بدراعاته، وطلّع الحاجة اللي بتنيّم دي، وقام خاطفها للقصر اللي تحت المية عشان يخليها نايمة على طول ومتشوفش نور الشمس تاني.

وفي يوم زي كل يوم، والشمس بتطلع، كان الراجل خيال الظل زي عادته بيبص على المرجانة عروسة البحر عشان يطمن عليها مع كل طلعة شمس.. ملقاش المرجانة عروسة البحر!

راح بسرعة يسأل الحمامة الخضرا اللي كانت بتبعتلها الوردة كل يوم. راحت الحمامة الخضرا قالتله إن الأخطبوط الشرير خطف المرجانة عروسة البحر، وقالتله إنه حابسها في القصر اللي تحت في قاع البحر، وإن مفيش حاجة هتبطّل السحر وتفك أسرها إلا اللؤلؤة المسحورة.

راح بسرعة الراجل خيال الظل مصفّر بصوت عالي.. قام طلعله فرس النهر، ركبه وراح بيه بسرعة على البحر، ونزل بيه البحر.

وبعدين وهما ماشيين قابلوا السمك المنشار، فسأله الراجل خيال الظل: ألاقي فين اللؤلؤة المسحورة عشان أفك أسر المرجانة عروسة البحر؟

قاله: مش هتلاقي اللؤلؤة المسحورة إلا في السفينة المهجورة اللي في قاع البحر.. بس خلّي بالك، أهم حاجة توصل قبل الساعة ١٢ الضهر، عشان إنت مع كل شوية بعد الوقت ده هتبدأ تختفي، ولو موصلتش مش هتعرف تنقذ المرجانة عروسة البحر.

فقال الراجل خيال الظل لفرس النهر: يلا بسرعة على السفينة المهجورة! قاله: لأ، أنا مقدرش أدخل في أعماق البحر أكتر من كده.. فقام الراجل خيال الظل قابل الحوت الكبير، وقاله: يا حوت، أنا عايز أروح للسفينة المهجورة اللي فيها اللؤلؤة المسحورة عشان أنقذ المرجانة عروسة البحر.

راح الحوت سأله: إنت مش خايف مني؟ راح الراجل خيال الظل قاله: لأ.. أنا عارف إنك راجل طيب، وعارف إني أد إيه بحب المرجانة عروسة البحر، وأنا متأكد إنك هتساعدني.

وفعلًا ركب الراجل خيال الظل على الحوت، وعشان الحوت كبير وخطوته واسعة، وصل بسرعة للسفينة المهجورة. بس كان بيحرسها سمك القرش. كان سمك القرش بيحوم حواليها، ولو حاول الراجل خيال الظل يدخل، سمك القرش مش هيسيبه وهيفترسه. والساعة بقت ١١، والراجل خيال الظل خلاص مش هيلحق.

راح الراجل خيال الظل فكّر في فكرة.. قام طالع من المية بسرعة عند الشمس، وعكس أشعتها بالصدفات البحرية عشان يرميها في عين سمك القرش، فمبقاش عارف يشوف.

وفعلًا سمك القرش مبقاش شايف حاجة، فقام طالع لفوق شوية من البحر.. وهنا عرف الحوت إنه يمسكه ويضربه، فراح سمك القرش هرب بسرعة بعيد أوي.

ونزل الراجل خيال الظل بسرعة عشان يجيب اللؤلؤة المسحورة، وراح لها عند القمرة اللي في السفينة.. بس لقاها جوه صدفة مقفولة مش بتتفتح. يعمل إيه؟

الراجل خيال الظل مش عارف يعمل إيه.. والساعة بقت ١، وشوية شوية بدأ يختفي مع الغروب. قام راح للحمامة وقالها: أنا عايز أفتح الصدفة عشان أطلّع اللؤلؤة المسحورة وأنقذ المرجانة عروسة البحر.

راحت الحمامة قالتله: الصدفة دي مش بتتفتح إلا لو أخدتها عند القصر والشمس طالعة، وتقول: «يا سمسم يا عنتور.. افتحلنا البلّور»، وتعكس عليها أشعة الشمس. ساعتها الصدفة تتفتح، وتخرج منها اللؤلؤة المسحورة، وتنقذ المرجانة عروسة البحر.

قام الراجل خيال الظل بسرعة، وأخد الصدفة، وراح عند القصر اللي فيه الأخطبوط الشرير حابس المرجانة عروسة البحر. وقعد يتمتم: «يا سمسم يا عنتور.. افتحلنا البلّور.. يا سمسم يا عنتور.. افتحلنا البلّور».. وطلعت اللؤلؤة المسحورة من الصدفة، والمرجانة عروسة البحر بدأت تفوق.

وهنا طلع الأخطبوط الشرير، والراجل خيال الظل مش عارف يعمل إيه. راح للحمامة، فقالتله إن الأخطبوط الشرير ده بيطلّع من كل دراع ليه نوع سم مختلف. جري الراجل خيال الظل بسرعة على الكابوريا، والساعة بقت ٤، وقالها: تعالي معايا عشان ننقذ المرجانة عروسة البحر من الأخطبوط الشرير. راحت الكابوريا رايحة معاه.

والأخطبوط عمّال يضرب بدراعاته، وعمّال يلف حواليها.. راحت الكابوريا قاصّة له دراع، ومسكته وعضّته.. وهنا ضعف الأخطبوط..

وهرب الأخطبوط الشرير لآخر قاع البحر ومرجعش تاني. وفاقت المرجانة عروسة البحر، وأول ما فتحت عينيها شافت الراجل خيال الظل لأول مرة، وعرفت إنه هو اللي كان بيبعتلها الوردة كل يوم مع الحمامة الخضرا..

واللؤلؤة المسحورة نوّرت، وفكّت سحر الراجل خيال الظل، فبقى راجل بالنهار وبالليل ومبقاش يختفي مع الغروب تاني. واتجوز الراجل خيال الظل المرجانة عروسة البحر، وعاشوا في تبات ونبات.. وخلّفوا صبيان وبنات.