الأمير
والقصيرة

كان يا ما كان.. كان في أمير طويل.. بس كان وحيد. الأمير ده كان نفسه يلاقي بنت تحبه ويتجوزها وتبقى أم عياله.. لكن لأنه كان طويل أوي.. فالبنات مكانتش بتحبه.

مامة الأمير دي كانت شايلة همه، وكان صعبان عليها أوي. أد إيه كان نفسها تفرح بيه، وهي شايفاه على طول زعلان ووحيد.

فقررت مامة الأمير إنها تروح للساحرة، عشان تشوف حل لمشكلة ابنها الأمير الطويل..

لما مامة الأمير راحتلها.. قالتلها: مفيش حل لمشكلة الأمير الطويل إلا أقصر فتاة في المدينة.. واستغربت الأم أوي.

راحت الساحرة إدتها بذور، وقالتلها: البذور دي تزرعيها تحت شباك أقصر فتاة في المدينة..

خرجت الأم وهي كلها حيرة.. طب إزاي؟ أقصر فتاة في المدينة؟ ودي ألاقيها فين، وأعرفها منين؟

والأم سرحانة وبتفكر، كانت شايفة البنات وهم بيملوا المية من النهر زي كل يوم.. رايحين نازلين طالعين، بيملوا المية..

وفجأة، في وسط كل البنات دول.. لفتت نظرها بنت قصيرة أوي، عمالة طالعة نازلة زي ما تكون بتتدحرج، من كتر ما هي قصيرة. فضلت تبص وتتفرج عليها.

وفي مرة من المرات، والبنت نازلة تملى المية، كانت بتوطي.. فاختل توازنها، ومن كتر ما هي قصيرة معرفتش تعمل حاجة، ووقعت في النهر..

وعمالة تستغيث، مش عارفة تعوم ولا تعمل حاجة، والمية جارفاها..

راحت مامة الأمير بسرعة للقصر، ونادت الحراس عشان ينقذوا البنت القصيرة. وفعلًا الحراس جريوا يقفلوا البوابات على النهر، وطلعوا البنت القصيرة منه وأنقذوها، ووصلوها لحد بيتها.. اللي عرفته بعد كده أم الأمير.

وبالليل، من غير ما حد يحس.. راحت أم الأمير تحت شباك البنوتة القصيرة، وزرعت البذور اللي الساحرة إدتهالها، وهي مش عارفة إيه اللي هيحصل..

وجه يوم جديد.. وصباح جديد.. وفجأة صحيت أم الأمير وهي في القصر على ضجة وأصوات عالية.. المدينة كلها مقلوبة.. فيه إيه؟ فيه إيه؟

خرجت أم الأمير عشان تشوف فيه إيه.. لقت البذور اللي زرعتها تحت شباك البنوتة القصيرة كبرت.. كبرت أوي، وشالت بيت البنت وهي جواه، وطلعت لفوق.. والبنت عمالة تستغيث، ومحدش عارف ينقذها..

بسرعة راحت الأم نادت على الأمير الطويل، عشان يحاول يساعد وينقذ البنت.. وفعلًا خد الأمير حصانه، وطار على بيت البنوتة.. لقى بيتها بقى فوق نبات طويل، وهي مش عارفة تنزل ولا تعمل حاجة.

وعشان الأمير كان طويل.. طلع ولقى البنت، وطمنها وقالها: متخافيش.. ومسكها، وبراحة كان بيحاول ينزلها على الأرض..

وهو بيعمل كده.. راحت عينه جت في عينها.. وبصتله، وقالتله: شكرًا.. إنت أنقذت حياتي.. راح الأمير ابتسم وقالها: لأ.. إنتي اللي أنقذتي حياتي.. أنا لولاكي كان زماني لسه وحيد.

وفعلًا اتجوز الأمير الطويل البنوتة القصيرة.. وكانت مامة الأمير فرحانة ومبسوطة أوي.. أخيرًا ابنها لقى البنت اللي بيحبها وتحبه. وراحت مامته عملتلهم فرح كبير أوي في القصر، حضره كل المدينة.

وعاش الأمير الطويل والبنوتة القصيرة بعد كده سوا متهنيين، وخلفوا بنات كتير، وولاد طوال وقصيرين.. وتوتة توتة.. فرغت الحدوتة.